ବ୍ରହ୍ମପୁର ସାଂସଦ ଡଃ ପ୍ରଦୀପ କୁମାର ପାଣିଗ୍ରାହୀଙ୍କ ଦ୍ୱାରା ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କୁ ପତ୍ର

ବ୍ରହ୍ମପୁର /ଭୁବନେଶ୍ୱର :ବ୍ରହ୍ମପୁର ସଂସଦୀୟ କ୍ଷେତ୍ରର ମାନ୍ୟବର ସାଂସଦ ଡଃ ପ୍ରଦୀପ କୁମାର ପାଣିଗ୍ରାହୀ, ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କୁ ଏକ ସ୍ୱତନ୍ତ୍ର ପତ୍ର ଲେଖି ଋଷିକୂଲ୍ୟା ନଦୀ ଉପରେ ହାଇ-ଲେଭେଲ୍ ରୋଡ୍ ଓଭର ବ୍ରିଜ୍ (ROB – ଲେଭେଲ୍ କ୍ରସିଂ ନଂ. ୨୮୪) ନିର୍ମାଣ କାର୍ଯ୍ୟକୁ ତୁରନ୍ତ ଆଗେଇ ନେବା ପାଇଁ ଅନୁରୋଧ କରିଛନ୍ତି।​ପୂର୍ବତଟ ରେଳବାଇର ଜେନେରାଲ ମ୍ୟାନେଜରଙ୍କ ପତ୍ର (ପତ୍ର ସଂଖ୍ୟା: ECoR/GA/MP-MLA/190/686, ତା – ୦୮.୦୮.୨୦୨୬) ଅନୁସାରେ, ରେଳ ବିଭାଗ ଏବଂ ରାଜ୍ୟ ପୂର୍ତ୍ତ (PWD) ବିଭାଗର ମିଳିତ ପରିଦର୍ଶନ ପରେ ସେତୁର ନୂତନ ଆଲାଇନମେଣ୍ଟ ଆନୁଷ୍ଠାନିକ ଭାବେ ନିର୍ଦ୍ଧାରିତ ହୋଇସାରିଛି। ଏହାଦ୍ୱାରା ୩ୟ ଓ ୪ର୍ଥ ରେଳ ଲାଇନ୍ ନିର୍ମାଣରେ କୌଣସି ବାଧା ସୃଷ୍ଟି ହେବ ନାହିଁ।​ସାଂସଦ ଡଃ ପାଣିଗ୍ରାହୀ ଜଣାଇଛନ୍ତି ଯେ, ଛତ୍ରପୁର ଆପ୍ରୋଚ୍ (ସେତୁ ସଂଖ୍ୟା ୯୫୦) ପାଇଁ ରାଜ୍ୟ ସଡ଼କ/ପୂର୍ତ୍ତ ବିଭାଗ ପକ୍ଷରୁ “ଜେନେରାଲ ଆରେଞ୍ଜମେଣ୍ଟ ଡ୍ରଇଂ” (GAD) ରେଳ ବିଭାଗକୁ ହସ୍ତାନ୍ତର କରାଯିବା ବାକି ଅଛି। ଏହି Technical Drawing (GAD) ମିଳିବା ମାତ୍ରେ ରେଳ ବିଭାଗ ଏହାର ଚୂଡ଼ାନ୍ତ ମଞ୍ଜୁରୀ ପ୍ରଦାନ କରିବ।​ଗଞ୍ଜାମ ଜିଲ୍ଲାର ଜନସାଧାରଣଙ୍କ ଯାତାୟାତ ସୁବିଧା ଏବଂ ଜଳବନ୍ଦୀ ସମସ୍ୟାର ସ୍ଥାୟୀ ସମାଧାନ ପାଇଁ ରାଜ୍ୟ ପୂର୍ତ୍ତ ବିଭାଗକୁ ତୁରନ୍ତ GAD ଚୂଡ଼ାନ୍ତ କରି ରେଳବାଇକୁ ପଠାଇବା ପାଇଁ ନିର୍ଦ୍ଦେଶ ଦେବାକୁ ସାଂସଦ, ମୁଖ୍ୟମନ୍ତ୍ରୀଙ୍କ ଆଶୁ ହସ୍ତକ୍ଷେପ ଲୋଡ଼ିଛନ୍ତି।