କଟକ, ଏସସିବି ମେଡିକାଲରେ ଚାଲିଥିବା ଟେଣ୍ଡର ଆଧାରିତ କାମକୁ ନେଇ ଉଠିଛି ଗୁରୁତର ଅଭିଯୋଗ। ନିର୍ଦ୍ଧାରିତ ମାନଦଣ୍ଡ ଅନୁସାରେ ସାମଗ୍ରୀ ବ୍ୟବହାର କରାଯାଉନଥିବା ଏବଂ କେତେକ ସ୍ଥାନରେ ନିମ୍ନମାନର ସାମଗ୍ରୀ ବ୍ୟବହାର ହେଉଥିବା ନେଇ ଅଭିଯୋଗ ଆସିଛି। ଅଭିଯୋଗକାରୀଙ୍କ କହିବା ଅନୁଯାୟୀ, ଟେଣ୍ଡରରେ ଉଲ୍ଲେଖିତ ମାନ ଓ ନିର୍ଦ୍ଦିଷ୍ଟତାକୁ ଅଣଦେଖା କରି କାମ ଆଗେଇ ନିଆଯାଉଛି। ଏହାଦ୍ୱାରା ସରକାରୀ ଅର୍ଥର ଅପବ୍ୟବହାର ସହ ହସ୍ପିଟାଲର ଗୁଣବତ୍ତା ଓ ରୋଗୀ ସୁରକ୍ଷା ଉପରେ ମଧ୍ୟ ପ୍ରଶ୍ନ ଉଠୁଛି। ଅନ୍ୟପକ୍ଷରେ, କାମର ତଦାରଖ ଓ ଗୁଣବତ୍ତା ଯାଞ୍ଚ ଦାୟିତ୍ୱରେ ଥିବା କେତେକ ଅଧିକାରୀଙ୍କ ଭୂମିକାକୁ ନେଇ ମଧ୍ୟ ଅଭିଯୋଗ ହୋଇଛି। ଅଭିଯୋଗରେ କୁହାଯାଇଛି ଯେ, ଠିକାଦାରଙ୍କ ସହ ଅଧିକାରୀମାନଙ୍କ ମଧ୍ୟରେ ଅନୁଚିତ ସମ୍ପର୍କ ଥିବାରୁ ଅନିୟମିତତା ଉପରେ ଆବଶ୍ୟକ ପଦକ୍ଷେପ ନିଆଯାଉନାହିଁ। ଏପରିକି ଅଧିକାରୀମାନେ ମୋଟା ଅଙ୍କର ଅର୍ଥ ନେଇ ନୀରବ ରହୁଥିବା ନେଇ ମଧ୍ୟ ଅଭିଯୋଗ ରହିଛି। ତେବେ ଏହି ଅଭିଯୋଗର ସ୍ୱାଧୀନ ଭାବେ ସତ୍ୟତା ଯାଞ୍ଚ ହୋଇନାହିଁ। ଏହି ଘଟଣାରେ ଟେଣ୍ଡର ପ୍ରକ୍ରିୟା, ବ୍ୟବହୃତ ସାମଗ୍ରୀର ଗୁଣବତ୍ତା, ବିଲ୍ ପ୍ରଦାନ ଓ କାମର ମାପଚୁପକୁ ନେଇ ନିରପେକ୍ଷ ତଦନ୍ତ କରାଯିବାକୁ ଦାବି ହେଉଛି। ଅଭିଯୋଗ ସତ୍ୟ ହେଲେ ସମ୍ପୃକ୍ତ ଠିକାଦାର ଓ ଦାୟିତ୍ୱରେ ଥିବା ଅଧିକାରୀଙ୍କ ବିରୋଧରେ ନିୟମାନୁସାରେ କଠୋର କାର୍ଯ୍ୟାନୁଷ୍ଠାନ ନେବା ସହ ସରକାରୀ ଅର୍ଥର କ୍ଷତି ଭରଣା କରାଯିବାକୁ ଦାବି ଉଠିଛି। ତେବେ ଏହି ସମସ୍ତ ଅଭିଯୋଗ ନେଇ ଏସିବି କର୍ତ୍ତୃପକ୍ଷ ଓ ସମ୍ପୃକ୍ତ ଠିକାଦାରଙ୍କ ପକ୍ଷରୁ ଅଧିକୃତ ପ୍ରତିକ୍ରିୟା ମିଳିଲେ ଘଟଣାର ପ୍ରକୃତ ଚିତ୍ର ଆହୁରି ସ୍ପଷ୍ଟ ହେବ।
